القلم

تخطر عليّا اهموم
انقول بنسطّرها
بالك ايجيها يوم
تلقى اللّي ايقدّرها
نجي للقلم نجري
خايف من النسيان
انقول:
بدري بدري
نكتب اللّي في خاطري
حتى ولو عنوان
نلقى القلم مدّاري
اندوّر وما نلاقيه
انقلّب جوانب داري
ملهوف عقلي عليه
يضيعن بنات أفكاري
وأنا اندوّر فيه

واخد على الخذلان
هذا صحيح
صاحب خدعني
وغيره خذلني
وآخر نكرني بعد ما ظلّلني
واخد على الخذلان
هذا صحيح
اللي نقصده نلقاه واخد ريح
إلا القلم
ما كنت متصور إنّه يخذلني
وآخر قزازه
فـ خاطري يكسرها

تخطر عليّا اهموم
انقول بنسطّرهـا
بالك ايجيها يوم
تلقى اللي ايقدّرها